::Purong Noypi::

Wala lang...

2007-11-13T12:55:00.000+08:00

Madalas nating sabihin 'wala lang' na halos katumbas ng 'whatever' sa Ingles. Dala ng kasanayan o araw-araw na gamit, maaaring ikaw mismo ngayon ay ganito sumagot kapag wala ka nang masabi.

Sa tagal ng hindi ko pagbalagbag dito, wala akong masabi kundi--wala lang.

Galaw-galaw

2006-01-17T12:05:00.000+08:00

Oo nga, kumbaga sa radyo, nawala ako sa ere -- sobra!

Sabi nga ni Lhen, sa sobrang dami ko raw pinagkaka-abalahan, marami na 'kong nalilimutang kalikutin -- hehehe -- hindi 'yon.

Sa dami nga ng kailangan ko pang pagka-abalahan, 'di ko alam kung saan magsisimula. Buti na lang, nakakasingit pa akong mag-'Internet' dahil inangkin na ng mga anak ko ang kinakalawang kong 'laptop' at inaraw-araw ang paglalaro ng 'Empire Earth' at 'Warcraft III' (buti 'yon para malimutan nila ang inuungot nilang 'PSP' o kaya 'Gameboy Micro' daw).

Hay... sandali at meron na naman akong kailangang gawin!

Punong Abala

2005-12-20T13:02:00.000+08:00

Sobra, ngayon ko lang uli ito gagawin.

Sa dami ng ginagawa ko ngayon (tulog ng 1am, gising ng 6:30am, trabaho, trabaho, trabaho...) talagang wala ng oras (ultimo pamamasyal sa 'Web' hindi ko na magawa), pati si Lhen nagrereklamo na.

Ang totoo, isa na akong punong abala. Sa nagdaang tatlong (3) buwan, wala akong ibang ginawa kundi magparo't-parito, Caloocan - Parañaque, Ortigas - Makati, mag-ayos ng mga ipinamanang problema at humarap sa mga kakaibang pagsubok. Hindi naman talaga ako 'sales person' pero ngayon, kahit natutulog na ako, maraming numero (milyong piso) ang nagtatalun-talon sa isip ko. Benta, benta, benta... Awa ng Itaas, hindi pa ako sumusuko.

Ansarap, kasi balik sa dating gawi -- ang 'Pinoy-style' na 'corporate politics' -- 'chicken' na nga sa akin 'to eh. At ang walang kapararakang tsismis ng kung anu-ano para itaas o ibaba ang kasama sa trabaho -- hay, 'kailangan pa bang i-memorize niyan?' sabi nga sa radyo.

Ang mahalaga, minsan hindi mo kailangan ng sandamakmak na kaibigan, mamili ka dahil sabi nga nila, kayu-kayo rin ang magkikita sa 'finals.' Sa mga nakasama ko sa samu't-saring pagsubok nuon at ngayon, maraming salamat.

At nagkaroon pa nga ako ng panahon para dito?

Tabing Ilog

2005-11-13T20:27:00.001+08:00

Ako ay nasa tabing ilog...

Inaabala ang sarili sa salimuot.

Oo-Hindi: Basilio, Crispin, Sisa, nasan kayo?

2005-09-27T10:20:00.000+08:00

Oo, pasulpot-sulpot ako...

Hindi, masyado kong hinanap ang mga nakasanayan ko (at talagang 'di ko na kakayanin uling ngumuyngoy sa sobrang kalungkutan at pangungulila sa asawa ko't mga anak) kaya nagdesisyon akong manatili na sa 'Pinas. Marami nga ang nagtatanong sa akin at nagtataka -- bakit? Karamihan nga't nagkukumahog at halos ibenta lahat ng ari-arian makaalis lang ng 'Pinas tapos eto ako't pinakawalan ko pa ang pagkakataong maaaring magpayaman sa akin habang buhay.

Hindi, pasensiya, pero hindi ako kailanman nasilaw ng karangyaan. Mahalaga para sa akin ang pamilya ko, ang makita kong natututo nang magsulat ng pangalan at magbilang ng hanggang sampu si Kirk Marcus (si bunso), ang makasama sa 'Family Day' at umabot sa 'big-day' ni Kurt Martin (si kuya), at siyempre ang araw-araw, gabi-gabing makasama, makatabi, makausap si Lhen (ang sinta ko) - na nasa piling nila ako sa hirap o ginhawa.

Oo, walang nagbago sa akin, ang totoo nga, mas lalong naging ako ako. Nag-ala Samson nga ako eh, pinagupit ko ang mahaba ko ng buhok, parang nagsimula uli sa dati...

Oo, '...ang mamatay ng dahil sa'yo' (ng Lokal Brown), 'Pinas pa rin...

Wala Akong Masabi

2005-09-08T10:41:00.000+08:00

Pero 'di ko mapigilang manggigil...

Napuyat ako 'nung isang araw (halos sinabayan ko sila sa Kongreso) para masaksihan lang ang walang ka-kwenta-kwentang pagtutuos ng samut-saring trapong mas maputi pa ang puwit ng kawali mo.

Hay...

Nu Luk

2005-09-06T11:32:00.000+08:00

Ang aking nu-luk, hehehe... (Tamang namamanglaw 'di ba)

Maligayang Pag-Ibig

2005-09-06T11:21:00.000+08:00

Lhen,

Sinong mag-aakala na matatagalan nating magkatuwang na harapin ang tadyak at sipa ng buhay? Madalas mong tanungin kung bakit, ang tutoo, unang kita ko pa lang sa iyo alam kong ikaw na. Hindi kita mahal... kasi mahal na mahal na mahal na mahal na mahal (....bilyones....) kita!

Toksik Weysk

Bu-ay na bu-ay

2005-08-22T21:12:00.000+08:00

Lifehouse ang nasa 'most played' ng iPod ko. Ang boses ng 'frontman' na si Jason Wade ay pinaghalong Eddie Vedder (ng Pearl Jam) at Matt Scannell (ng Vertical Horizon). Sa mga kanta, paborito kong patugtugin ang 'Blind' at 'Into The Sun.' Sana makahanap ako ng mga nauna nilang 'albums.'

Hak - naks...

2005-08-19T19:38:00.000+08:00

Pagbati ke Josel ng Hack Undertaker. Biruin mo 'yon, sa Canada ka pa pinugayan? Naks...

'Eto Na Ko

2005-08-19T19:19:00.000+08:00

Matapos ang mahabang pagliban sa aking balagbag, 'eto na uli ako.

Wala pa ring nagbago sa 'Pinas, gano'n pa rin, paikut-ikot lang na problema. Mula sa patay-malisya nating presidente (na kesyo kinailangang magpunta ng kanyang asawa sa US para mapagtuunan niya ang kanyang trabaho) hanggang sa tuluy-tuloy na pagtaas ng bilihin, pamasahe, at kung anu-ano pa (kawawa naman si Juan dela Cruz 'di na siya nakabangon).

Ang mahirap tanggapin -- tayong lahat na Noypi ang guma(ga)wa ng problema, hindi lang ang presidente, ang dinayang eleksyon, ang baluktot na konstitusyon, ang 'di mawala-walang mga trapo at kung anu-ano pa -- lahat 'yan wala kang sisihin kundi ang sarili mo. Ang nakakalungkot lang, hindi tayo makaisip (tayong mga Noypi) ng solusyon na sasang-ayunan ng lahat.

Hay...

Binambo

2005-08-01T08:15:00.000+08:00

Isa sa mga una kong pinagkaabalahan 'nung una kong linggo dito sa 'Pinas ay ang Bamboo ('yung banda). Sabi ko nuon 'ke Lhen, gusto ko pag-uwi ko, mapanood sila ('yung 'As The Music Plays' nila ang bitbit ko lang na tugtog-Noypi).

At eto na nga, nuong nakaraang Huwebes, sumugod kami sa SM Fairview para sa libre nilang 'concert.' Kasama si Lhen at ang kanyang ateng si Tess, nagtiyaga kaming mag-antay ng alas-sais (inurong nila mula alas-kuwatro) at makipag-brasuhan sa mga pasaway na estudyante, mga punk-kuno (na naka-kontodo 'make-up' pa), mga nanay-wendy (naka-paldang uso ngayon) atbp. May mga pasaway na nainip at nakipagbatuhan ng bote ng 'mineral water' na 'me lamang ihi. Hay, matatawa ka kasi pagkatapos ng 'Halleluja' nag-uwian na ang mga pasaway (siguro 'yun lang ang alam nilang kanta).

Maniwala ka, nakipagbrasuhan din ako para magpapirma at kumuha ng litrato (hindi ako ito!) Heheheheh...

Masa--rap!

2005-07-30T05:01:00.000+08:00

Matagal akong nawala... kasi nasa 'Pinas ako ngayon! Hehehe, bakasyon, bakasyon, bakasyon! Inaabala ko ngayon ang sarili ko sa mga pag-kain at syempre 'shopping.' Pasensiya, hindi ako katulad ng iba -- wala akong uwing tsokolate (o kahit ano), mas gusto kong payamanin ang mga kalahi ko, hehehe. Hindi ko maipaliwanag ang nara(ra)mdaman kong kaligayahan na mayakap uli ang pamilya ko.

Ang mundo gamit ang Google 2

2005-07-20T10:10:00.000+08:00

Ang aking pamamasyal... sa London.

Kapastahan

2005-07-20T07:02:00.000+08:00

Oo, maniwala ka, 'spaghetti' ito, at dahil ako lang mag-isa ang kakain (marami pa sa 'fridge'), pang-48 na taon yan. Mamigay kaya ako sa mga kapitbahay? Hehehe...

Ang mundo gamit ang Google

2005-07-19T09:35:00.000+08:00

Kung 'di mo pa nasubukan, i-'download' mo ang libreng Google Earth. 'Nung una ko siyang gamitin, para akong diyos -- aba, oks-na-oks yata na maikot mo ang mundo, makita ang mga detalye (gaya ng 'city boundaries,' 'airports,' 'terrain' atbp. - sa mga piling bansa nga lang, ang 'Pinas 'di pa kasama) at mapasyalan ang magagandang tanawin sa iba't-ibang bahagi ng mundo. Hmm, mukhang konting panahon na lang, kita na sa 'Internet' ang bawat kilos mo...

Bagong luma

2005-07-18T12:30:00.000+08:00

Binago ko ang luma kong 'website' sa Yahoo-Geocities. 'La lang, marunong pa rin pala ako kahit papaano, hehehe.

Ang aso, baw!

2005-07-17T07:35:00.000+08:00

Natapos ko na ang 'The Curious Incident of the Dog in the Night-Time' ni Mark Haddon. Dahil mas nakasanayan kong magbasa ng Sheldon at Grisham, nag-antay ako ng mga sorpresang ikot ng istorya -- kakaiba siya -- dahil ang puno't dulo ng istorya ay walang iba kundi ang aso, at maaaliw ka sa mga pananaw (at mga pagpapasaway) ng 15 anyos na 'special kid' na bida. Ganda siya...

Lalo lang akong nalungkot

2005-07-14T21:22:00.000+08:00

Sabi nila, ilang buwan lang, lilipas rin yung nararamdaman kong pangungulila. Pwede mo bang turuan ang sarili mong masanay sa pangungulila? Halos pitong buwan na ako dito, hindi lumipas o naibsan man lang, ganon pa rin ang nararamdaman ko, lalo lang akong nalungkot...

Lalo pa't nasanay akong 'me asawang matiyagang nag-aasikaso sa akin, 'me mga anak na mangungulit at kukulitin ko, at syempre 'me katabi sa pagtulog. "Pag nalulungkot ka, tingnan mo lang yung mga 'pics' at 'video' namin sa cp ('cellphone') mo" sabi ni Lhen, pero pag ginagawa ko 'yon, lalo lang akong nalulungkot...

Nagkakausap naman kami araw-araw, nakakapag-'Webchat' ng madalas, pero pagkatapos 'non, balik sa realidad -- lalo lang akong nangulila -- lalo lang akong nalungkot...

Kung pwede lang hilahin ang mga araw, ginawa ko na -- madalas kong sabihin, pero syempre imposible. Isinusubsob ko na lang ang sarili ko sa trabaho, minsan walang pansinan (o kaya walang tayuan), sabi nga sa akin ng isang pasaway na puti "you don't talk that much.." ngiti lang ako (ganon naman talaga ako), gusto ko siyang sagutin "there's not much to say..." o kaya "what's to say that you haven't heard..." Isa pa, ayokong magsayang ng oras para alamin kung ano'ng "the best pill to boost sex drive" o kaya "the best weed in town." Hay, lalo lang akong nalungkot...

Eto ako

2005-07-14T12:30:00.000+08:00

Oo, ako 'to, seryoso. Nagpapahaba talaga ako ng buhok. Payat ko na 'no? Sige na...

Tagalog 'slang'

2005-07-14T11:30:00.000+08:00

'Me nagtanong sa aking pasaway na puti, kung meron daw mga Tagalog 'slang' o salitang balbal. O 'di ba, nagmalaki pa ako -- oo naman! Sandamakmak, at diyan yata magaling ang Noypi.

Ilan sa mga sikat --
yosi - sigarilyo
haybol - bahay
tsikot - kotse (binaliktad)
utol - kapatid (galing sa kaputol)
deadma - patay-malisya
lonta - pantalon
anda/andalush - pera
astig - tigas o tigasin
waswas - asawa

Mga pinasikat ko dati --
syompet - pokpok (pasensiya, para madali mong maintindihan)
deadhorse - marijuana (mas kilala mo siyang chongki)
jurassic - sayaw na pinauso ko dati pag islaman na, heheheh
riverside - gin o bilog
toothbrush - 'sex' (pasensiya uli, para madali mong maintindihan, hehehe)
madonna - tawag ko sa babae pag di ko alam pangalan
yoga - kupit (o mating)

Mga pinasikat ko kailan lang --
pukelya - wala lang, tawag ko pag kakaiba 'yung tao
pasaway - dito ko pinapasikat (pasensiya), kailangan ko pa bang ipaliwanag?

Ikaw, tiyak ko marami kang 'ekstra-ekstra' sa dilatura (bokabularyo) mo.

Pokikay...

2005-07-14T10:00:00.000+08:00

Tuwing mababalita si Tom Cruise (at syempre si Katie Holmes) hindi pwedeng 'di mabanggit ang 'Scientology.' Teka, hindi ito tungkol 'don. Naaalala ko rin kasi yung kaklase ko 'non sa kolehiyo (itago na lang natin sa pangalang Pokikay, hehehehe).

Ang siste -- 'graded recitation' namin 'non sa 'Biological Science.' Si Pokikay ay kilalang magsasakang sosyal - 'wag lang makahawak ng salamin, kahit me klase aabalahin niya ang kanyang sariling magsaka ng mga 'whiteheads' niya. At nuon ngang puntong nagsasaka siya, minalas naman na siya ang tinawag ng aming matandang-dalagang propesora (na hindi pa yata nag-agahan nung oras na 'yon).

'Pokikay, what is the science of tissues?' tanong ng propesora habang binabalasa ang mga 'classcards.' Syempre, hindi agad nakasagot ang pobreng Pokikay. Eto't umiral ang kalokohan namin ng barkada ko (malapit lang kami 'ke Pokikay) at ibinulong namin ang sagot. Aba, at parang nabuhayan ng loob, taas-nuong sumagot si Pokikay -- 'mam, TISSUEOLOGY!'

Ang sumunod na pangyayari? Hindi napigilan ng buong klaseng humagalpak sa tawa! Galit na galit sa amin ang propesora, kulang na lang tirisin niya kami isa-isa para tumigil sa pagtawa. Binigyan niya kami ng 'surprise quiz' sa sobrang inis. At ang Pokikay? Patay-malisya, kunwari walang nangyari, nakitawa na lang, hawak ang kanyang salamin.

Alug-alugin ang utak para maalala mo ang sagot...

Bagong T

2005-07-14T02:04:00.000+08:00

Dagdag sa mga koleksyon kong T:

'Wish' ko lang...

2005-07-14T00:15:00.000+08:00

Marami na kaming na-'make-a-wish' ni Lhen - 'camphone,' 'TV,' at kung anu-ano pang mga pangangailangan (masarap ang pakiramdam ng nakakatulong).

Ako kaya pwede ring humiling? Gusto ko nang umuwi...

Biri3 - Paula Cole

2005-07-13T23:30:00.000+08:00

Si Paula Cole ang pinakikinggan ko ngayon ('This Fire'), mas nakilala sa kantang 'I Don't Want To Wait' ('Dawson's Creek Theme') tsaka 'Me.' Katulad ni Tori Amos, isa siya sa mga kilalang sumusuporta sa Rape, Abuse & Incest National Network.

Mader

2005-07-12T11:36:00.000+08:00

Sa mahal kong biyenan, maligayang kaarawan 'Nay...

Oo-Hindi: Mga bagong pagkakaabalahan

2005-07-12T10:25:00.000+08:00

Oo, dumating na ang mga bago kong pagkakaabalahang libro ('fiction paperbacks').

Hindi, walang Sidney Sheldon ('plot twister'), John Grisham ('legal penner') at Dan Brown ('code maker/breaker'), napagod na ako sa kanila -- halos alam ko na agad ang istorya, kahit hindi ko pa natatapos ('predictable' na ito, isang araw lang natatapos ko na).

Oo, mga 'best-sellers' pa rin sila -- 'Skinny Dip' ni Carl Hiaasen at 'The Curious Incident of the Dog in the Night-Time' ni Mark Haddon.

Hindi, malamang matagalan ako sa kanila...

Oo-Hindi: Balitang balita

2005-07-07T22:30:00.000+08:00

Oo, balitang balita dito ang kaguluhan sa 'Pinas (at 'yun din ang napagkukwentuhan naming mag-asawa). May mga nagbitiw na, bagsak na ang piso ('yon kasi ang binabantayan ng mga mangangalakal) at karamihan (daw) ay nagsusulong na ngayon ng pagbibitiw ni GMA - pero mariing sinabi niyang handa siyang harapin lahat ng akusasyon (kung magkakaroon man ng 'impeachment trial') at mas pagtutuunan ng pansin ang mga sinumpaang gawain.

Hindi, kung maka-sarili ako, sasabihin kong 'eh di maganda' o 'well and good' kasi mataas na ang palitan (malapit na yatang maging 57 ang piso laban sa dolyar), kaya lang hindi - nalulungkot ako (at nag-aalala) sa mas matagal na epekto ng krisis na ito sa ekonomiya ng 'Pinas (alam naman nating sabay-sabay tumataas ang presyo at bihirang bumababa ulit).

Oo, nananalangin akong maayos na ang kaguluhang ito sa lalong madaling panahon.

Hindi, kahit malayo ako, 'di ko rin maiwasang 'di mag-alala. 'Wag Niyo pong pabayaan ang mga Noypi.

Sa loob ng 'mall'

2005-07-05T00:13:00.000+08:00

Hardin sa loob ng 'mall' - gandang tingnan, sarap pagmasdan.

Noyping nangingibang-bansa, dumadami?

2005-07-04T07:30:00.000+08:00

Sabi sa isang 'Breaking News' ng Inq7.net:

"The number of Filipino workers leaving the country for higher-paying jobs abroad breached the 500,000 mark in the first half of 2005. Acting Labor Secretary Danilo Cruz, citing figures from the Philippine Overseas Employment Administration, said a total of 502,772 OFWs were deployed abroad from January 1 to June 26 this year compared to the 483,496 OFWs deployed in the same period in 2004."

Hmm, madami na pala 'kami.' Magandang senyales ba ito? Habe nga:

"We are confident that our goal to deploy a million OFWs globally continues on a firm and stable track," Cruz said in a statement. He added that with this development, OFW remittances could reach $10 billion this year. Last year, OFWs sent $8.5 billion to their dependents in the country. OFW remittances, it has been acknowledged, have kept the country's battered economy afloat."

Hmm (ulit), parang 'di ko gusto ang tono ng 'confident' at 'goal to deploy' ni Cruz, na parang hinihikayat talaga ang Noypi na hanapin ang kanyang magandang kapalaran 'abroad' at magpadala ng bilyong dolyares. Oo, naniniwala akong malaking tulong ang mga 'remittances' pero may ginagawa ba para hindi na kinakailangang mangibang bansa pa para makahanap ng 'high-paying job?'

Karamihan sa mga Noypi na nangibang-bansa, tinalikuran ang maganda (sa pamantayan natin) nilang trabaho para kumita ng mas malaki (nurse sa 'Pinas, caregiver sa Canada; engineer sa 'Pinas, clerk sa Switzerland; teacher sa 'Pinas, yaya sa Hong Kong; atbp.) o kaya permanente nang manirahan doon. Walang mali (o nakakahiya) sa mga trabahong 'yon o sa paghahangad ng maayos na pumumuhay (sino bang ayaw yumaman?) -- kaya lang, kung ang mataas na pasahod (o masaganang buhay) eh wala sa 'Pinas, mapipigil mo nga bang lumaki ang bilang ng mga Noyping nangingibang-bansa?

Ayokong tawaging suwerte, pero marami rin naman ang katulad kong nakahanap ng kapareho o mas maganda pang trabaho sa labas ng 'Pinas. Dati, ni hindi sumagi sa isip ko ang mag-'abroad' - sabi ko, kaya ko 'to (hindi ko pinagtrabaho ang asawa ko kahit kelan). Pero, heto ako't nakipagsapalaran na rin, umaasang sa pag-uwi ko, 'di ko na kinakailangan pang umalis uli.

Sana, katulad ng ibang papaunlad na bansa, matuto na ang 'Pinas na tumayo mula sa pagkakadapa nito (kahit ilang beses pa) gamit ang sariling paa. At sana, ikaw, 'wag mong ikahiya, Noypi ka pa rin, kahit ano'ng trabaho mo, kahit 'san ka magpunta, 'wag pasaway, mag-Tagalog ka na lang.

Live8 pa rin

2005-07-03T22:28:00.000+08:00

Whew, tapos na ang Live8.

Sa dami ng mga nagsalita ('surprise appearance' kuno) yung kay Bill Gates ako natuwa (para kasing na-op siya). Sino ba namang 'di nakakakilala sa 'Microsoft tycoon' na nangungunang 'Forbes' Richest' at kilalang 'backer' ni Tony Blair (British Prime Minister) sa mga kampanya nito patungkol sa 'debt, aid and trade' sa mga mahihirap na kontinente/bansa gaya ng Africa.

"I believe that if you show people the problems and you show them the solutions they will be moved to act... The huge turnout for Live8 here and around the world proves that... We know what to do, the generosity we are asking for can save millions of lives... We can do this and when we do it will be the best thing that humanity has ever done."

Palakpakan! Bill, kung sana lahat ng mayayaman eh katulad mo. Saludo ako 'ke Bob Geldof at Bono.

Live8 Na!

2005-07-03T02:43:00.000+08:00

Kung (maaga kang) nakasali sa MakePovertyHistory.org o kaya nag-'upload' ng 'image' mo o nagpalista ng pangalan sa Live8Live.com, malamang naisama ka sa 'video clips' o kaya sa mga 'print displays' ng Live8 (malamang 'di mo rin makikita kasi malilito ka kung ano uunahin mong panoorin--London, Berlin, Philadelphia, atbp.). Pero hindi pa huli, tuluy-tuloy ang kampanyang ito, bago ganapin ang G8 Summit sa Scotland sa Hulyo 6-8, '05.

Hindi, sa bahay lang ako nanuod. Ewan ko sa 'Pinas kung pinalabas lahat, dito pinilit i-'cover' lahat ng 'venue.' Naluha talaga ako ng ipakita ni Bob Geldof (London) yung 'file video' ng Africa. Mga batang halos buto't balat na lang, hirap sa pagkilos, nagmumuta, nilalangaw, hubo't-hubad. Nakakabagbag naman ng loob (lalim 'non ha) na isa sa pinakitang bata, eh dalaga na ngayon (malusog na siya) at aral daw sa isang unibersidad.

Sa 'Pinas, deadma na ang a-ha, pero dito sikat sila, tumugtog sila sa Berlin. Syempre, tuwa ako sa Black Eyed Peas (Philadelphia) kasi me Pinoy 'don no. At walang kupas talaga si Michael Stipe ng R.E.M. (London), 'I'm not worthy' talaga, me pinta pa ang mukha. Si Craig David at Tina Arena ('go' siya kahit buntis) sa Paris nag-'duet' ng 'Come Together.' Sino'ng tatalo sa porma ni Bjork (Tokyo)? Hay, naalala ko ang 'high school days' ko nung kantahin ni Bob Geldof ang 'I Don't Like Mondays' naging 'anthem' namin 'yon dati no.

Hay, gtg, Audioslave na ang pinapakita (parang hirap na hirap si Chris Cornell sa 'Like A Stone')...

Gyerang sorbetes

2005-07-02T08:21:00.000+08:00

Napanood ko na ang 'War of the Worlds' ni Steven Spielberg.

Pasensiya, para siyang sorbetes (hmp, bawal sa akin lahat ng may gatas). Matigas siya 'nung una, na 'nung lasap na lasap mo na ang sarap, lumambot siya hanggang tuluyan ng natunaw (o, ano iniisip mo, sorbetes pa rin ang tinutukoy ko). Panoorin mo na lang para malaman mo (tutal mainit sa 'Pinas, sabayan mo ng pagkain ng sorbetes).

Syempre dahil Spielberg 'to, pamatay ang mga 'effects' pero ewan ko hindi ako masyadong nagulantang. Base ito sa 'classic' ni H.G. Wells na hinaluan ni Spielberg ng ibang anggulo--'di lang pang-pamilya, pang-pasaway pa. Ano pa bang magagawa ko eh katsokaran ni Spielberg si Tom Cruise (naniniwala sa 'Church of Scientology' na kaaway ngayon ni Brooke Shields at na 'wow mali' sa premier mismo ng pelikulang 'to), sinama pa ang tili-ng-tiling si Dakota Fanning, si Miranda Otto (mas maaalala mo siya sa 'Lord of the Rings') at ang pasaway na pagganap ni Tim Robbins (pasensiya, 'di ko kilala 'yung artistang gumanap na 'Robbie').

Hulaan mo kung ano nagpatunaw ng sorbetes - 'yung istorya o 'yung mga artista? Tiyak ko, paglabas mo ng sinehan, marami kang tanong.

Anibersaryo - Hulyo 02, '05

2005-07-02T06:00:00.000+08:00

Maligayang anibersaryo Mahal! Mahal na mahal kita, lagi mong tatandaan. Moah.

Magbilang ba

2005-07-01T23:15:00.000+08:00

Hulyo 05 na. 166 na araw pa ang bubunuin ko. Parang mabilis na mabagal (huh?) ang oras. Akala ko nga nuon, 'di ako tatagal, biruin mo 6 na buwan na pala ang lumipas!

'Weekend' intriga

2005-07-01T21:45:00.000+08:00

Naiintriga sila sa akin -- ano raw ang pinagkakaabalahan ko tuwing 'weekends.'

Dahil sa sakit kong bato ('kidney stone'), maraming bawal sa akin (alak, tsokolate, lahat ng masasarap, hay...), kaya sumama man ako sa mga gimik nila, tutunganga lang ako (kahit 'softdrinks' bawal sa akin). Isa pa, ibang klaseng gimik meron sila dito ('di mo na gugustuhing alamin pa). Mas gusto ko pang mag-isa kaysa sumama sa kanila (isnabero talaga). Sumasama naman ako kapag 'wholesome' ang gimik nila--iyon eh kapag kakain sa labas.

'Shopping' ang naging bisyo ko dito. Minsan, kahit me pasok, pag naiinis ako, hala punta sa 'mall' at mag-'release' ng tensyon sa pamamagitan ng 'shopping.' Tuloy, pag-uwi ko nito tiyak sandamakmak ang bagahe ko. Idagdag mo pa 'don yung mga 'paperbacks' na nabili ko dito.

Araw-araw, telebabad ako kausap si Lhen. Nagpapasalamat nga ako't merong 'Webchat.' Dahil dito, hindi lang kami nakakapag-'textchat' ni Lhen, nakikita ko pa siya at ang mga bata (at kita rin nila ako syempre) at 'me 'voicechat' pa. Yun nga lang, pagkatapos naming mag-'chat' balik agad sa realidad--hay, eto ako't nag-iisa, nalolongkot at walang magawa. Pero isipin mo dati na wala pang YM, kailangan mo pang gumawa at magpadala ng sulat (o mag-'voice recording' sa 'tape') at antayin ang sagot, mas mahirap nuon tiyak - 'di kaya ng 'powers' ko 'yon.

Biyernes na naman, magtatanong na naman sila kung anong meron ako ngayong 'weekend.' Pasensya, ~zero~ ako pag 'weekends' -- masaya akong maging abala sa pamilya ko.

Adobeng Adobo

2005-07-01T05:57:00.000+08:00

Adobo po 'yan, maniwala ka. Manok na nalunod sa toyo.

Kapatid ng sinungaling ang magnanakaw

2005-07-01T05:02:00.000+08:00

Napanood ko si Susan Roces sa Inq7.net at wala akong masabi--antaray ng lola mo!

Hindi naman na kailangan pang pag-awayan kung dapat pakinggan yung 'tape' eh, inamin na ni GMA. Kausapin mo lang ang kaibigan nating si Google, hanapin ang pamosong 'Hello Garci' at marami kang mababasang 'text' nung kanilang usapan. Nakakahiya, kasi abot kahit saan ang balita--ilang beses ko siyang napanood sa CNN at BBC (at 'me podcast siya ha!), nabasa sa Yahoo News, at napag-usapan sa sandamakmak na mga blogsites. Para na ring pinatunayan yung ating 'rank' sa 'one of the most corrupt in Asia.'

Galit na galit ang Susan, bakit nga naman ngayon lang nagsalita ang kanyang 'besprend.' Sa palagay ko, isa yon sa taktika ng lola mong ekonimista ('less talk, less mistake') para 'di masyadong matakot ang mga dayuhang mangangalakal. Aminin man natin at hindi, pera ang nagpapaikot ng kahit ano (kahit kalderong nangingitim na sa uling, huh?) at minsan kailangang unahing intindihin ang pera (ang piso) kaysa sa mga kababayan mo.

Tingnan mo na lang ang reaksiyon ng piso, bagsak! At bakit parang hati yata ang opinyon ng karamihan? Napagod na siguro si Juan dela Cruz sa 'People Power' kasi laging me 'sequel.' Karamihan parang gusto na lang na tanggapin ang pagsusumamo ni GMA, iwas gulo raw, pagbigyan pa uli, tutal aalis na (o tatakas na?) ang kanyang asawa't anak (na dawit sa maraming eskandalo) para magawa niya ang dapat niyang gawin (huh, ibig mong sabihin talagang pasaway ang asawa't anak niya?).

Masaya ang 'Pinas ngayon, maraming pwedeng pag-usapan, pero tingnan mo't sandali lang yan, magbabago ang timpla ng balita. Magkakamag-anak yan--sinungaling, magnanakaw, manloloko, mang-aagaw at kung anu-ano pang kawalanghiyaan. Parang pelikula 'di ba--simulan mo, tatapusin ko. Sabunutan na lang!

Hay... gusto kong sumigaw (pisil ko ilong ko) -- kay Susan tayo! Heheheheheh...

Salamas

2005-07-01T04:09:00.000+08:00

Salamat 'ke Josel, para akong nag 'time space warp-ngayon din!' sa pakikinig ng OPM. Nasa Wikipedia ang mga paborito kong banda gaya ng Eraserheads at Yano, sayang lang naghiwa-hiwalay na sila ng landas.

Swanging Siyudad

2005-07-01T03:55:00.000+08:00

Ang siyudad sa gabi, nakakalulang liwanag, nambubuyo. Walang sinabi sa bangis ng usok ng 'Pinas.

Taglish o Englog

2005-07-01T03:32:00.000+08:00

Sa isang 'cover story' ng Newsweek na nabasa ko (Marso 05) 'Who Owns English?' na-ekstra ang Noypi. Syempre, sa Asya, tayo yata ang pinakamagaling magsalita ng binansagang 'East Asian Standardizing English.'

'Kataka lang, tawag natin don eh Taglish (Tagalog-English), pero ang tawag pala nila eh Englog (English-Tagalog), pasaway, dating tuloy sa akin eh pagkain (parang tapsilog). Gusto ko sanang sulatan yung reporter (para magreklamo?), pero 'di ko na nagawa (o 'di ko na naalalang gawin). Sabi, maraming bansa na ang nagsisimulang mag-aral ng English (gaya ng India, na isa sa kilalang 'outsourcing/tech support capital') para makasunod sa 'globalization.' Pasensiya, 'second language' namin yan, 'heksfert kami jan' huwag lang magsabay ang 'p' at 'f' o ang 'v' at 'b.'

Sana nga, dahil yan ang una kong problema pagluwas ko ng 'Pinas! Wala akong makausap ('hello' lang ang kaya nila), hirap. Para akong pipi na tuturu-turo na lang, minsan nakakapag-Tagalog pa ako ng 'di ko sinasadya. Hay...

Sige, mamaya, magluluto ako ng hamsilog (na naman), Noypi-'style.'

Nagpapasaway sa 'di kalayuan...

2005-07-01T00:50:00.000+08:00

Hindi ito ang una kong 'blog' (na babansagan kong balagbag), pero ito ang magiging dakdakan ko simula ngayon (na isusulat ko sa Pilipino o Tagalog). Hindi ako magmamagaling, dahil tiyak may magagamit akong mga salitang 'English' o 'pop speak' pero Noypi kasi ako eh -- sa isip, salita, at gawa -- ikaw ba?

Malayo ako ngayon sa 'Pinas -- at sa mga sunud-sunod na mga pangit na pangyayari 'don, marami ang nagtatanong sa akin - 'proud' pa rin ba akong Pinoy? OO NAMAN. Noyping-noypi 'to no... puro. Kahit ano pa ang itatak sa atin -- kesyo 'DH by profession,' 'caregiver hub' o 'TNT topnotcher' - hindi ko itatangging Pinoy ako.

Pasensiya, kung merong problema ang Pinoy iyon eh walang iba kundi ang kanyang sarili. Sino nga ba ang Pinoy? Dapat nga hindi Pinoy ang tawag sa kanya eh, dapat Pasaway, kasi ang dami niyang 'only in the Philippines' na hindi mo malaman kung maipagmamalaki o ikahihiya mo. Meron nga bang 'identity crisis' ang Pinoy? Hmm, sige 'wag kang mahiya, sagutin mo.

Hay... 'ang buhay parang life' sabi nga ng mga coño. Minsan, kailangan mong malayo para talagang malaman mo kung gaano kahalaga ang pinagmulan mo. Kaya eto ako, nagpapasaway sa 'di kalayuan. Pag-uwi ko ng 'Pinas, mag-aalaga ako ng kuting, ipapangalan ko sa kanya - Garci. 'La lang...